 |
| Marcellus I, recentissimus "rex" Portugaliae et Algarbiorum (effigies excerpta e diario electronico quod vulgo "O Ouriço" nuncupatur) |
Marcellus Rebelo de Sousa, novus civitatis
portugalensium præses, regis modo munere fungi suo videtur. Suopte ingenio blandissimus,
quadam populari præditus aura, omnium gratiam et benevolentiam pertinaciter
aucupans, ad dextram sinistramque callide adspiciens, crebriter nostris
sumptibus peregrinans, domnus iste Marcellus, princeps Lusitanorum, magister
affectuum nuncupatus, amatur atque adoratur a viris et mulieribus, patribus ac
matribus familias, equitibus matronisque, pueris puellisque, effeminatis et
viraginibus, senibus ac iuvenibus, doctoribus et piscatoribus, cæcis surdisque,
divitibus et pauperibus, sacerdotibus mendicisque, latronibus ac meretricibus, etiam
a felibus gallinisque, cunctis animantibus et quibusdam aliis...
